Ørsta kommune støttar fullt ut det Språkrådet tek opp i Sunnmørsposten onsdag 26. juli om manglande nynorsk på ferjene. Dette har vi teke opp før, og det er no på høg tid at fylkeskommunen og Statens Vegvesen, tek saka.
Vi ønskjer ikkje bortforklaringar om at ferjedrifta er på anbod eller at skilta er permanente. Kanskje er enkelte bokstavar vanskeleg å flytte, men det meste er monterte eller limte skilt, som burde vere enkle å flytte eller endre. Dette handlar om haldningar, evne og vilje. Fleire og fleire reiseoperatører ser no at nynorsk kan vere positivt i marknadsføring, så her bør fylket og ferjeoperatør tenkje på same måte!
Språk er dessutan kultur og identitet. Som de veit husar Ørsta det nasjonale Ivar Aasen senteret, og vi har lange og sterke nynorsk-tradisjonar. Vi ser derfor fram til at ferjene i vårt nærområde får nynorsk snart.
Vi ønskjer også oppdatert informasjon på ferjene. Eitt eksempel er ferja MF Goma som trafikerer på Hjørundfjorden. I oversikta over ferjestrekningar er framleis Eiksund-Rjånes innteikna 10 år etter at sambandet er lagt ned, og tunellsamband som Eiksundtunnelen og Kvivsvegen er ikkje med. Dessutan viser områdekartet ein heilt annan geografisk del av fylket. Informasjonen på ferjene har fylkeskommunen og Statens Vegvesen ansvaret for uavhengig av ferjeoperatør, og vi ber no om at dette straks blir oppdatert. Ørsta kommune ønskjer også eit samarbeid med fylket, der vi gjerne kan lage og presentere nøytral informasjon om kommunen eller nærområdet.
Ørsta har fantastiske naturområde, og vi opplever fleire og fleire gjestar og stor pågang til Hjørundfjorden. Der har vi fleire fine turmål som Saksa, Urke-egga og Slogen. Då må vi samtidig gi god informasjon - og dette er noko kommunen også skal bli endå betre på! Vi veit sjølvsagt at språk og informasjon på ferjene ikkje skaper fleire besøk i seg sjølv, men dette handlar om å vere medvitne, og kva inntrykk og uttrykk vi gir vidare til gjestane våre.
Med venleg helsing,
Stein Aam
Ordførar Ørsta kommune