Dette ønsket kjem som ei følgje av at to regjeringsutnemnde ekspertutval har lagt fram rapportar som vedkjem spesialundervisninga i Noreg. I det eine utvalet (Hagen-utvalet) vert det føreslege at Statped, ein statleg organisasjon som gir hjelp og støtte til kommunane og utdanningsinstitusjonar innan spesialpedagogikk, skal leggast ned.
I det andre utvalet (Nordahl-utvalet) vert det føreslege å ta bort den lovfesta retten til spesialundervisning og erstatte den med retten til ein kompetent lærar.
Konsekvensen av ei nedlegging av Statped, er at oppgåvene vert lagt til Utdanningsdirektoratet og Fylkeskommunane.
- I denne samanhengen vil vi ordførarar og rådmenn på Søre Sunnmøre gjere merksam på den særskilte kompetansen vi har i spesialpedagogikk i vårt område og at vi meiner at det vil vere ein vinn-vinn situasjon for heile fylket og for regionen vår at fylkeskommunal aktivitet innan feltet blir lokalisert her, seier Volda-ordførar Jørgen Amdam på vegne av Sjustjerne-samarbeidet.
Sterkt fagmiljø
Skulle funksjonane bli lagt til Møre og Romsdal fylkeskommune, ønskjer ordførarane og rådmennene på Søre Sunnmøre at funksjonane skal bli lagt til denne regionen på grunn av fagmiljøet ein sit med gjennom den interkommunale PP-tenesta lokalisert i Ulsteinvik og høgskulemiljøet i Volda.
Høgskulen i Volda har utdanna meir enn 150 spesialpedagogar på masternivå, mange av desse er busette i regionen. Høgskulen har også bachelor- og masternivå innan til dømes spesialpedagogikk, sosialt arbeid og barnevern, og også ein eigen doktorgrad innan feltet i samarbeid med høgskulen i Molde.
Nordahl-utvalet har påpeika kor viktig det er med samarbeid mellom høgskule og kommunar/fylkeskommunar og det er peika på oppgåver som bør overførast frå Statped til slike kompetansemiljø.
- Det er neppe nokon region i fylket der det vil vere lettare å rekruttere høg kompetanse til dette viktige arbeidet, seier Amdam.
I tillegg samarbeider kommunane Hareid, Ulstein, Volda og Ørsta om sams PP-teneste og som har base i Ulsteinvik. Også her er det eit fagmiljø med høg kompetase og som samarbeider tett med høgskulen og kommunane.
Teke opp i 2019
Det er meldt om at dette vil bli teke opp i ei Stortingsmelding i 2019. Uansett vil det truleg skje ei endring som vil føre til overføring av kompetansearbeidsplassar frå statsnivået til fylka – både fylkeskommunen og kommunane.
Skulle ansvaret falle til fylkeskommunen, har ordførarane og rådmennene stor tru på at det vil vere positivt for både regionen og for tenestetilbodet at oppgåvene blir lagt til Søre Sunnmøre.
- Vi forventar at Møre og Romsdal fylkeskommune er klar til å ta i mot Statped sine funksjonar i regionreforma. Ei lokalisering av desse kompetansearbeidsplassane til Søre Sunnmøre vil gi fleire statlege arbeidsplassar til ein region som av Fylkestinget er prioritert for å få fleire statlege arbeidsplassar, forklarar Amdam.
Dei påpeikar at å samle Statped både vil styrke det spesialpedagogiske fagmiljøet og innslaget av statlege kompetansearbeidsplassar på Søre Sunnmøre, og ha eit godt utgangspunkt for samspel med dei spesialpedagogiske tenestene både hos fylkeskommunen og kommunane i fylket.