Mellom Ørstahallen, pumptrack-bana og ungdomsskulen står den splitter nye aktivitetsparken med treningsapparat og skatebane. Parken har allereie blitt teke i bruk med aktivitet frå morgon til kveld. Under opninga var det talar, treningsframsyning og snorklipping. To elevar frå ungdomsskulen fekk æra av å klippe snora, med god rettleiing frå ordførar Stein Aam.
Det er Betongpark AS frå Oslo som har designa og stått for totalleveransen av aktivitetsparken. Berknes Maskin AS utførte grunnarbeidet i sommar. Skateparken har ei rulleflate på 900 kvadratmeter og 16 ulike skate-element. Treningsparken har ei flate på 500 kvadratmeter og 8 ulike apparat, der kvart apparat kan brukast til fleire ulike øvingar. Her kan ein leike og ha det kjekt samtidig som ein får ei god treningsøkt. Parken er godt opplyst og har 2 ladestolpar for mobiltelefon, spesialdesigna av Vik Ørsta og Elektroservice.
Mange ressurspersonar har stått på for å realisere prosjektet. Kristin Riise frå Velle skule og Einar Myrold frå Ørsta ungdomsskule har vore viktige pådrivarar og kunne under opninga fortelje suksesshistorier om barn og unge som har funne sin arena i skatemiljøet, og om ivrige elevar som spring ut i friminutta for å leike i parken. Frå Ørsta kommune har hovudprosjektgruppa bestått av Olav Saure, Dag Jarle Aa og Eva Haugen Øye.
Kostnaden for aktivitetsparken på 6,7 millionar kroner er finansiert av spelemidlar, fylkesmidlar frå tettstadprogrammet, Sparebanken Møre, brettklubben, X2, samt koronamidlar og avsette midlar frå Ørsta kommune. Vik Ørsta og Elektroservice har vore med og sponsa ladestolpane til mobiltelefon.
Ørsta Aktivitetspark er open for alle og vi håpar dette blir eit inkluderande samlingspunkt i Ørsta sentrum. Her er det rom for folk i alle aldrar, uansett om de vil skate, sykle, trene, leike eller vere tilskodar.