Mange ville høyre om tilvisingsavtale

Wenche Solheim / Ørsta kommune

Ørsta kommune og Husbanken inviterte tysdag til informasjonsmøte om tilvisingsavtale. Mange ville høyre meir om ordninga og det var god deltaking frå byggebransjen, næringskontor, politikk, administrasjon og BuLyst.

Utgangspunktet er at vi ønskjer 30 utleigebustadar med tilvisingsavtale med ein eller fleire utbyggjarar som har som formål å eige, forvalte og leige ut bustadar (profesjonelle utleigeaktørar). Ein tilvisingsavtale gjev kommunen rett til å disponere 40% av alle bustadane i eit prosjekt i 20 år, medan utbyggar står fritt til å leige ut dei gjenværande bustadane på den ordinære marknaden. Ein tilvisingsavtale med kommunen gjev utbyggar tilgang til særs gunstig lånefinansiering gjennom Husbanken.

Tilvisingsavtale er ei ordning for å skaffe fleire utleigebustadar, både for kommunen og den ordinære utleigemarknaden i Ørsta. Vi ønskjer meir offentleg/privat samarbeid om utleigebustadar i framtida.

Søknadsfrist for tilvisingsavtale er 12. juni og vi håpar fleire aktørar melder si interesse for ordninga.

Søknadskjema 

I tillegg til kommunen sitt eige behov for utleigebustadar, vil ordninga også auke talet utleigebustadar på den ordinære marknaden. Ei aldrande befolkning, å auke tal bustadar til leige som er tilgjengelege også ved funksjonsnedsetting, å generelt auke tal utleigebustadar på privatmarknaden er viktig. Ørsta treng eit større tilbod av utleigebustadar i framtida, å leige bustad skal vere eit trygt alternativ.

Vi treng å auke talet utleigebustadar som ligg sentrumsnært med gangavstand til matvarebutikk, sentrumsfunksjonar og offentleg transport. Dette gjeld i sentrum, men også Hovdebygda og grendene våre Vartdal, Barstadvik og Sæbø treng utleigebustadar i nærleik av butikk/møteplass og offentleg transport. 

Dette er viktige faktorar for at innbyggarane våre skal klare seg sjølv i størst mogleg grad og bu heime lengst mogleg.

Følg oss