Medverknad er ein grunnleggjande del av planarbeidet og det er viktig at dette skjer tidleg i fasen for det er då innbyggarane i størst grad kan vere med å påverke.
Planleggar Ingvild Kjøde fortel: "Det er veldig kjekt å arrangere folkemøte når responsen er så positiv. Mange møtte og engasjementet kom tydeleg fram i form av gode diskusjonar. Eg trur slike møtepunkt er bra på fleire måtar, kommunen får innspel og det er ei moglegheit til å diskutere og møte andre samfunnsengasjerte menneske."
Dette arbeidet har som mål å:
- Sikre at planarbeidet fungerer som den primære arenaen for overordna diskusjonar kring kommunen si framtidige utvikling. Dette betyr ei solid vurdering av ulike retningar og strategiar som vil forme kommunen i åra som kjem.
- Forankre samfunnsdelen , både politisk og administrativt, og for innbyggarane og andre relevante aktørar (næring).
- Innbyggarane, organisasjonar og næringsliv må få høve til å bidra gjennom medverknad i ulike fora. Folkemøte/dialogmøte og ulike typar arbeidsverkstadar er aktuelle møtepunkt for å gi og få innspel.
Medverknadsaktivitetar som blir gjennomført er mellom anna; folkemøte, digital spørjeundersøking, digital medverknad, arbeidsverkstad med folkevalde, arbeidsverkstad med arbeidstakarorganisasjonane, innbyggarlab.
«Vidare ønsker vi å få til ein mobil "pop-up-innbyggarlab". Vi tenker då å lage til ein møteplass ulike plassar i kommunen der innbyggjarar kan kome inn å snakke med oss. I tillegg skal vi gjennomføre ei spørjeundersøking for ungdom. Vi er også open for forslag for andre måtar vi kan møte innbyggjarane på», seier Ingvild Kjøde.
Arbeidet med heilskapleg innsatstrapp går parallelt med planarbeidet for samfunnsdelen og i folkemøtet var det fokus på kva den einskilde kan gjere for å take i vare helse og eit godt liv både for oss sjølve og dei vi har omsorg for. Frivillig deltaking og engasjement gir stor verdi til lokalsamfunnet, og det var mange flotte frivilligaktørar som deltok i møtet. I oppsummeringa frå gruppearbeidet kom det forslag om korleis kommunen og frivillige kan samhandle meir og betre.
Engasjerte folk og mange gode innspel.
Ingvild Marie Taraldset / Ørsta kommune