Ørsta kommune samarbeider med alkovettorganisasjonen Av-og-til for å førebyggje skadeverknadene av alkohol, særleg på arenaer for barn og unge.
– Barneidretten er utruleg viktig for mange barn. Her opplever dei meistring, tryggleik og glede. For barn som veks opp i ein heim der mamma eller pappa drikk for mykje, kan idretten gjere den store forskjellen, seier Ingvild Endal, Av-og-til-koordinator i Ørsta kommune.
Treng trygge vaksne
Dei fleste er einige om at barneidrett og alkohol ikkje høyrer saman.
– Alkohol øydelegg dei trygge rammene i idretten. Sjølv om haldningane er gode og dei aller fleste av oss tek avstand frå alkohol i barneidretten, er det dessverre overraskande mange klubbar som opplever utfordringar med alkohol, seier Randi Hagen Eriksrud, generalsekretær i Av-og-til.
Dersom klubben har klare retningslinjer for alkohol, er det lettare både for leiarane, trenarane og foreldra å ta sin del av ansvaret.
Ver ein god støttespelar
I kvar ein klubb kjem det barn på trening med den vonde hemmelegheita at mamma eller pappa drikk for mykje alkohol.
– For ein støttespelar i barneidretten handlar det om å sjå kvart enkelt barn og situasjonen til det enkelte barnet. Ver interessert og spør korleis det går. Vis at du bryr deg, oppfordrar Ingvild Endal i Ørsta kommune.
Vil du vite meir om korleis du kan vere ein god støttespelar i idretten?
Meld deg på til nyhendebrev og få verkty, tips og råd for arbeidet i idrettslaget
Ørsta kommune er ein Av-og-til-kommune
Ørsta er ein Av-og-til-kommune og jobbar saman med Av-og-til for å redusere dei negative følgjene av alkoholbruk. Vi samarbeider om fleire kampanjar, mellom anna fokusveka, som er eit felles krafttak for å setje alkohol og idrett på agendaen.
Av-og-til-koordinator Ingvild Endal, ingvild.endal@orsta.kommune.no