Veit du kvar du skal gå dersom mobilnettet og straumen fell ut?

Veit du kvar du skal gå dersom mobilnettet og straumen fell ut?

Ei blide gjeng som står utanfor fasaden på Ørsta rådhus. Det heng eit stor gult beredskapsskilt på veggen bak dei. - Klikk for stort bileteKriseleiinga framfor det nye informasjonspunktet på Ørsta rådhus. Ingeborg M. Bjørneset

Ørsta kommune har no fått på plass informasjonspunkt for publikum. Og der kan du møte beredskapskoordinator denne veka.

Dei gule skilta er hengde opp, og informasjonspunkta er klare til bruk dersom ei krise gjer det vanskeleg å kommunisere på vanleg måte.

Ved langvarig straumbrot eller bortfall av mobilnett kan det bli vanskeleg å ringe, bruke internett eller få viktig informasjon. I slike situasjonar kan innbyggjarane møte opp på eit av kommunen sine informasjonspunkt.

Her kan du:

  • be om hjelp dersom du treng assistanse
  • melde frå om situasjonar som krev oppfølging
  • få viktig informasjon frå kommunen og nødetatane

Her finn du informasjonspunkta

Det er sett opp gule skilt ved inngangspartia på desse stadene:

  • Ørsta rådhus, Dalevegen 6
  • Vartdal Helsetun, Vartdalsstranda 1225
  • Hjørundfjordheimen, Øyragata 20
  • Øye Branndepot, Norangdal 81

Skilta er godt synlege og viser kvar du skal møte opp dersom kommunen tek informasjonspunkta i bruk under ei krise.

Slik ser skilta på informasjonspunkta ut.

Eit ekstra tryggingsnett

Til vanleg får vi raskt informasjon gjennom telefon, internett og digitale kanalar. Men ved langvarige straumbrot eller problem med mobilnettet kan desse kanalane falle bort. Informasjonspunkta skal då vere ein stad der innbyggjarane kan få kontakt og viktig informasjon. Tiltaket er ein del av kommunen sitt beredskapsarbeid og skal bidra til tryggleik og god kommunikasjon, også når dei vanlege kommunikasjonskanalane ikkje fungerer.

Er du nysgjerrig på informasjonspunkt? Møt beredskapskoordinator på punkta i beredskapsveka

  • Tysdag 27. oktober kl. 13.00–14.00 på Ørsta rådhus
  • Tysdag 27. oktober kl. 11.00–12.00 på Vartdal Helsetun
  • Onsdag 28. oktober kl. 11.30–12.30 på Hjørundfjordheimen
  • Onsdag 28. oktober kl. 13.30–14.30 på Øye Branndepot

Beredskapsveka er eit godt høve til å førebu seg på situasjonar der kvardagen ikkje fungerer som normalt. Ta gjerne ein ekstra kikk på oversikta over informasjonspunkta og finn ut kva punkt som er nærast der du bur.

Kart, bilde og meir informasjon om informasjonspunkta.

Publisert 26.10.2026 08:45