Erlend Sporstøl Vikestrand/Thomas Winther Leira
PRESSEMELDING 30. april 2026
Skal greie ut framtidig kommunestruktur i Volda og Ørsta
Volda og Ørsta kommunar ønsker å gjennomføre ei heilskapleg og kunnskapsbasert utgreiing av ein mogleg framtidig kommunestruktur. Kommunane har no lyst ut eit oppdrag der eksterne fagmiljø blir inviterte til å gi tilbod på utgreiinga.
Bakgrunnen er eit ønske om å få eit solid og fagleg grunnlag før politikarane tek stilling til vegen vidare i kvar kommune.
Kommunane har i dag eit etablert interkommunalt samarbeid, mellom anna gjennom Sjustjerna-samarbeidet på Søre Sunnmøre. Dette vil vere ein naturleg del av vurderinga av framtidige løysingar.
Kvifor ei slik utgreiing?
Utviklinga i samfunnet gjer det nødvendig å sjå nærare på korleis kommunane kan organiserast i framtida. Endringar i demografi, økonomi og krav til kommunale tenester påverkar evna til å løyse dei viktigaste oppgåvene.
Utgreiinga skal vere framtidsretta og ta utgangspunkt i både dagens situasjon og langsiktige utviklingstrekk innan demografi, økonomi, samfunnsutvikling og kommunale kjerneoppgåver.
Målet er å utarbeide eit kunnskapsgrunnlag som:
- analyserer og vurderer mogleg framtidig kommunestruktur
- synleggjer konsekvensar, risiko og mogleg gevinst
- gir eit godt grunnlag for politisk handsaming
Utgreiinga skal også leggje til rette for god medverknad frå innbyggarar.
Kva skal utgreiast?
Utgreiinga skal omfatte ei brei vurdering av mellom anna:
- utvikling i folketal, arbeidsmarknad og økonomi
- kvalitet og kapasitet i kommunale tenester og fagmiljø
- samfunnsutvikling, næringsliv og arealbruk
- lokaldemokrati og innbyggarmedverknad
- økonomisk bereevne og organisering
Det skal også gjennomførast analysar av ulike alternativ, inkludert vidareføring av dagens struktur, forsterka samarbeid og ei eventuell samanslåing av Volda og Ørsta.
Ikkje eit vedtak om samanslåing
Det er viktig å understreke at dette ikkje er eit vedtak om kommunesamanslåing. Utgreiinga skal gi oversikt og kunnskap, men inneber inga avgjerd i seg sjølv.
Arbeidet skal liggje på eit overordna og strategisk nivå, og gi eit solid grunnlag for vidare politiske vurderingar – ikkje detaljplanlegging av ei eventuell samanslåing.
Tidsplan og kostnadsramme
Utgreiinga har ei øvre kostnadsramme på 1 million kroner ekskl. mva:
- 0,8 million kroner til hovudleveransen
- 0,2 million kroner til eventuelle tilleggsutgreiingar
Hovudutgreiinga skal etter planen vere ferdig hausten 2026.
Tilbodsfrist
Fristen for å levere tilbod er 18. mai 2026.
Vidare informasjon om oppdraget ligg i konkurransegrunnlaget (PDF, 334 kB).
Kontaktpersonar:
Ordførar Volda, Sølvi Dimmen
Ordførar Ørsta, Per Are Sørheim