Feiing og tilsyn

Feiing og tilsyn

Feiing

Feiing er ei lovpålagd oppgåve. Kommunen skal syte for at røykkanalar i fyringsanlegg som brukast til oppvarming av byggverk vert feia ved behov.  Denne tenesta er dekt av feie- og tilsynsgebyret. 

For at feiing skal kunne gjennomførast må det vere tilfredsstillande feietilkomst enten frå tak eller frå feieluke. 

Sjå kva du må gjere Før og etter feiing 

Feietilkomst

Tilkomst på tak

  • Der det er feiing frå tak med helling utover, skal det vere montert takstige – både for at feiaren skal kunne bevege seg trygt og for å unngå skade på taket. 
  • Takstigen må vere godkjent og montert i samsvar med monteringsrettleiing.  
  • Takstigen skal ligge inntil skorsteinen og gå opp til mønet, eventuelt i overkant av skorsteinen, slik at feiaren kan stå i takstigen (der det ikkje er feieplattform) under feiinga. 

Plattform – Om avstand frå stige til der kosten skal ned er høgare enn 1,2 m må det vere plattform eller feieluke. 
Gangbru – Mellom to skorsteinar skal tilkomst skje via takbru, eventuelt kan det monterast eigen takstige til kvar skorstein. 
Eigar sitt ansvar – Det er eigar som etter brannvernlovgjevinga er ansvarleg for at det er tilfredsstillande tilkomst for feiing. 

Tilsyn

Tilsyn er ei lovpålagd oppgåve. Kommunen skal syte for at det ved behov vert ført tilsyn med fyringsanlegg som brukast til oppvarming av byggverk. Fyringsanlegg omfattar både eldstad, røykkanal og evt. matesystem for brensel. 

Denne tenesta er dekt av feie- og tilsynsgebyret. 

Når ein planlegg tilsyn, sett ein som regel opp tilsyn for heile dagen. Dette gjer at det oftast ikkje er mogleg å kome på eit anna tidspunkt enn det som er oppsett den dagen tilsynet er planlagt. Dersom det planlagde tilsynet ikkje høver for huseigar er det sjølvsagt råd å ta kontakt med brannførebyggar og få bytte til ein annan dag. Ver merksam på at brannførebyggar ikkje svarar på telefon dersom han er på tilsyn, men vil ringe deg tilbake så snart han har høve. Send gjerne sms i staden for å ringe. 

Ved tilsynet må brannførebyggar ha tilgang til heile fyringsanlegget og huseigar eller representant for huseigar må difor vere til stades. Ein må rekne med at tilsynet varer mellom 30–60 minutt. Feiing og inspeksjon frå tak vert ikkje gjort ved tilsynet. 

Sjå kva du må gjere Før og under tilsyn.

Tilsynet vil omfatte kontroll av at 

  • eventuelle tidlegare registrerte avvik og merknadar er følgt opp og utbetra 
  • ny eldstad eller vesentlege endringar ved fyringsanlegget er meldt til kommunen 
  • eldstad, røykkanal, skorstein og eventuelt matesystem for brensel er tilfredsstillande bygd og montert 
  • anlegget er tilfredsstillande kontrollert, ettersett og vedlikehalde 
  • det er montert røykvarslarar/brannalarmanlegg i samsvar med gjeldande krav 
  • det er tilstrekkeleg med sløkkeutstyr 
  • rømingsvegar er i samsvar med gjeldande krav 

Dersom det vert oppbevart gass og/eller brannfarleg væske i bygget vil ein og sjå på dette. 

Feiing og tilsyn med fyringsanlegg vert utført med heimel i Brann- og eksplosjonsvernlova og Forskrift om brannforebygging § 17. Lovpålagt feiing og tilsyn gjeld heilårsbustadar og fritidsbustadar som har eldstad kopla til skorsteinen.

Kontakt

Aret Engjaberg feiar
☎ 97163555
@ Aret Engjaberg
Ole Nedreberg brannførebyggar
☎ 48895236
@ Ole Nedreberg