Framlegget inneber krevjande prioriteringar for å sikre økonomisk balanse og forsvarlege tenester. Driftsnivået er foreslått redusert med om lag 83,8 millionar kroner frå 2026 til 2030.
Renter og avdrag er berekna til 160 millionar kroner i 2027. Disposisjonsfondet er tomt, og samla meirforbruk for 2024–2026 er venta å bli 86,4 millionar kroner. Ørsta er i ROBEK og må dekkje meirforbruket før kommunen kan meldast ut.
Framlegget for 2027 er i balanse, men gir ikkje rom for inndekking av tidlegare meirforbruk dette året. Utviklingsplanen ligg til grunn for innsparingane og omstillinga.
Framlegget omfattar òg auka eigedomsskatt for andre eigedomar enn bustader og fritidsbustader: frå 4 til 5 promille i 2027, vidare til 6 i 2028 og 7 i 2029. For bustader og fritidsbustader er satsen uendra på 4 promille.
Reduksjonar som vil merkast
Framlegget inneber færre lærlingplassar, avvikling av ferie-SFO, redusert bibliotekbemanning og kulturtilbod, og reduksjonar i reinhald og eigedomsdrift. Det er òg foreslått fire veker samanhengande ferie for barna i kommunale barnehagar.
Tilboda blir mindre tilgjengelege, reinhaldet sjeldnare og driftsoppgåver endra eller tekne bort. Færre lærlingplassar kan svekkje rekrutteringa, og barnehageferien kan gjere ferieplanlegginga vanskelegare.
Større endringar krev utgreiing og medverknad
Budsjettframlegget tek òg omsyn til at vi blir færre barn og unge, og fleire eldre. Tenestetilbodet må endrast i takt med behova. Framlegget til økonomiplan føreset færre skular, med eigne utgreiingar, medverknad og politiske vedtak.
Følgjene for elevar, lokalsamfunn, skuleskyss og bygg skal vurderast. Innan helse, omsorg og velferd skal behov, bemanning og bygg vurderast samla. I pleie og omsorg vidarefører kommunedirektøren å kutte vikarbyrå og nytte lokale vikarar for å redusere meirforbruket. Rett kompetanse og forsvarleg drift må sikrast.
Prioriterer førebyggjande ungdomsarbeid
Kaihuset blir foreslått vidareført med same ramme som i dag. Dette lågterskeltilbodet for ungdom på ettermiddagstid blir prioritert for å førebyggje utanforskap.
Vegen mot økonomisk balanse er usikker
Planen tek sikte på å dekkje meirforbruket i økonomiplanperioden, men det er reell risiko for lengre tid i ROBEK. Særleg er tempoet i innsparingane innan helse, omsorg og velferd usikkert. Blir budsjettiltak tekne ut, må dei erstattast med tilsvarande innsparingar eller inntekter.
Kommunedirektøren sitt framlegg skal handsamast politisk. Formannskapet sitt budsjettframlegg skal på høyring i minst 14 dagar før kommunestyret gjer endeleg vedtak før årsskiftet.
Langsiktig utvikling innan stramme rammer
Ny vidaregåande skule og kulturhus skal gi arenaer for læring og fellesskap. Investeringsplanen føreset ingen nye låneopptak utanom sjølvkost og startlån. Attståande investeringar blir finansierte med mellom anna tidlegare unytta lånemidlar.
Samarbeid med næringslivet og frivilligheita skal støtte lokal utvikling. Utgreiinga av ei mogleg kommunesamanslåing og arbeidet med fleire interkommunale samarbeid skal gi grunnlag for framtidige val om tenester og fagmiljø. Utfallet av desse prosessane er ikkje avgjort.
Budsjett 2027 Økonomiplan 2027–2030