År 500 f. Kr–1050 e. Kr

Haugane er gravminne frå jarnalderen. Desse gravminna har vore sett i samanheng med aukande sosiale skilje og maktkonsentrasjon som oppstod i jordbrukssamfunnet. Du kan finne to gravhaugar på Velle, men her skal ha vore fleire. I følgje tradisjonen kan det vere Gosse Rekedal, Kvelp Mo, Grim Ose og/eller Iver Langerumpe som er gravlagd her.

Bygging av haugar og røyser var særleg utbreidd i yngre romartid (200–400 e. Kr), folkevandringstid (400–570 e. Kr) og vikingtid (800–1050 e. Kr), og dei fleste av gravhaugane i Ørsta kan truleg førast attende til ein av desse periodane.

Dei to gravhaugane var opphavleg kring 15 meter i tverrmål, men dei har vorte mykje skada og plyndra. Dei siste 30 åra er det gjennomført fleire arkeologiske registreringar og utgravingar på Velle. Ein har då klart å påvise fleire spor etter hus, dyrkingsflater og andre busettingsspor, som til dømes kokegroper. I gravhaugane er det berre funne oske og kolrestar. Men i nærleiken er det funne mellom anna eit sverd og ei øks, som stammar frå ei grav frå yngre jarnalder.