Lars Oscar har gjort seg bemerka på mange måtar, og prisen kviler på tre søyler: Arbeid mot formueskatten, arbeidet han har gjort for å gi nytt liv til Strømpeneset, og stor frivillig innsats – spesielt for å bidra til utvikling av eit finare Ørsta sentrum.

Føremålet med Næringsprisen er å gi honnør til ein einskild person, verksemd eller organisasjon som siste året har gjort ein ekstra innsats for å fremje næringslivet i Ørsta, m.a. ved etablering av nye arbeidsplassar eller sikring av eksisterande verksemd, og som kan tene som førebilete for næringslivet.

Lars Oscar er ein verdig kandidat til Næringsprisen, men det er særleg engasjementet rundt formueskatten som gjer at han i år har utmerka seg både lokalt og nasjonalt. Lars Oscar Fossen har gått til sak mot staten for å finne ut om den norske formueskatten bryt med menneskerettane og Grunnlova. Han har stilt seg i front for det norskeigde næringslivet som finn denne skatten særs urettvis.

Lars Oscar har, ved å stille seg i front for eit grasrotopprør mot formueskatten, synleggjort at dette ikkje er ein skatt for milliardærane, men ein skatt som råkar både små og mellomstore bedrifter, og som kan setje arbeidsplassar i fare. Den kan tappe lokale bedrifter for eigenkapital som igjen kan gå ut over utviklingsevna til bedriftene.

Lars Oscar har også i fleire år gjort mykje for å fornye og utvikle gamle næringsbygg. Han har og bidratt til å få bedrifter og næringsliv til å etablere seg og utvide i Ørsta. Han er ein dyktig utleigar som legg vekt på å ha høg kvalitet på dei lokala som han leiger ut. Fabrikklokala på Strømpeneset er omgjort til nokre av dei flottaste kontorlokala i Ørsta. Sjølvsagt med mykje møblar frå Ørsta-bedrifter med høgkvalitet og god design. I dag er det Vik Ørsta og Mowi som er dei største leigetakarane. Samla er det no 80 arbeidstakarar lokalisert på Strømpeneset.

Også i utviklinga av andre næringsbygg som td. Mosflata Næringsbygg, tidlegare Grepa fabrikken, har Lars Oscar vore viktig. Her hadde han ei nøkkelrolle i å utvikle bygget og få inn nye leigetakarar som til dømes Eiksenteret. Det er no langt fleire tilsette som jobbar i Mosflata Næringsbygg enn det var då Grepa hadde sin fabrikk der.

Ørsta Brygge var også eit tomt industribygg som Fossen var sentral i å utvikle. Bygget er no eit kombinert næringsbygg med om lag 60 moderne leiligheiter. Alle som har møtt Lars Oscar veit at han er engasjert, kreativ og har pågangsmot. Det var også noko av bakgrunnen for at Lars Oscar vart kåra til Årets Eldsjel i 2016. Då framheva juryen stikkord som engasjement, positivitet, og inspirasjon. «Fossen er seg sjølv, samlar støtte og får fått folk til å vere stolte av Ørsta sentrum.»

Tildeling av næringsprisen til Lars Oscar Øvstegård er ei viktig anerkjenning av det arbeidet han har utført over fleire år, og til inspirasjon og støtte framover. 

Gratulerer med Næringsprisen, Lars Oscar!

Lars Oscar Fossen Øvstegård er vinnaren av Næringsprisen 2024. Ingvild Marie Taraldset / Ørsta kommune

Fora Form AS er ei bedrift med lang historie i Ørsta, i ein bransje med lange og rotfesta tradisjonar på Sunnmøre. 

Fora Form er med sine om lag 40 tilsette framleis ein hjørnestein i industribygda Ørsta. I 2019 fylde bedrifta 90 år. I desse åra har dei gjennomlevd store omveltingar og utfordringar innan møbelindustrien.

Fora Form har halde fast på ein strategi med satsing på møblar til offentlege rom og bedriftsmarknaden – og med ei kompromisslaus satsing på god design, innovasjon og kvalitet. I denne marknaden har Fora Form vorte ei føregangsbedrift.

Det er ei sterk merkevare innan interiør og utsmykking av alt frå forsamlingslokale og møterom til flyplassar. Fora Form er den verksemda som har hausta flest designprisar i Noreg, uansett bransje. Produkta frå denne Ørsta-bedrifta er å finne nesten over alt i landet og er sterkt representert i utlandet også. Til dømes er mykje av møblane på Gardermoen frå nettopp Fora Form. 

Ei av styrkane til bedrifta er ein stabil og kompetent arbeidsstokk. Stabiliteten er ikkje berre ein fordel for bedrifta, det er også eit teikn på at Fora Form har lykkast med å skape eit godt arbeidsmiljø.  

Difor er det vel fortent, og på høg tid, at Fora Form får Ørsta kommune sin næringspris.

Michele Tharaldsen Hoggen mottok prisen til Fora Form. Ørsta kommune

Harald Vatne starta bedrifta i 2008 med base i Åmdalen. I 2018 vart dei ein del av Dekkpartner-kjeda og i 2019 flytta dei inn i meir sentrumsnære lokale i Anders Hovden-gate. Omsetninga har auka jamt, og bedrifta har no om lag 950 dekk-hotell kundar, noko som utgjer 3800 dekk på lager til ei kvar tid – det krev plass. Det har vore ein bratt bakke med vekst – frå fire millionar i Åmdalen, til 16 millionar i dag. I februar 2022 fusjonerte Vatne med MB Dekkservice AS og Morten Bjørdal kom inn på eigarsida. I tillegg til desse to har bedrifta ein fast tilsett og ein lærling. I periodar tek dei inn ekstra hjelp. Vatne og Bjørdal vil utvikle bedrifta vidare, og skal utvide lokala med ny hall.

Små verksemder som Vatne Dekkservice AS er viktige for samfunnet vårt. Det gir gode arbeidsplassar og livsgrunnlag for familiar.

Vatne Dekkservice AS er ei lita bedrift som har styrka sin posisjon med eit stort pågangsmot og ein stor arbeidsinnsats. Kundane seier at det er kjekt å kome til Dekkservice. Ein får god service, gode råd og blir tatt godt vare på av kjekke og trivelege personale.

Harald Vatne tok i mot diplom for Næringsprisen 2022, utdelt av varaordførar Karen Høydal. Ørsta kommune

Ørsta Camping har vore i drift sidan om lag 1960, då Otto O. Ose starta med campingplass for besøkande til Ørsta. I familiebedrifta hadde alle ei rolle, og barnebarna fekk tidleg hjelpe til. Vivian Ose Flø er tredje generasjon drivar av Ørsta Camping, og har vore ein del av drifta så lenge ho kan hugse. Både Berit og Ole-mann er framleis engasjerte i camping-delen, og er viktige bidragsytarar der.

Etter at Vivian tok over drifta har ho utvikla familiebedrifta på ein framifrå måte, og tilpassa seg marknaden både i høve servering og tilrettelegging for besøkande.

I mange år var det mykje laksefiskarar som kom, og faste gjestar har vore ein viktig del for bedrifta i alle år. Overnattingstilboda har utvikla seg i takt med tida, frå telt og små hytter, til spikartelt og hytter med standard som små bustadar. Ørsta Camping har difor hatt ei stor og viktig rolle for reiseliv og besøk til Ørsta i meir enn 60 år!

Kiosk og servering har vore eit viktig tilbod til fastbuande og tilreisande gjester. Dei første 25 åra var det sommarope, og mange Ørstingar som starta badesesongen på Vekslet i mai gledde seg over is-sal og anna godt ein kunne handle på campingen.

I 1986 vart ny kiosk bygd, og det vart heilårs-drift.

Mange unge har hatt sitt første møte med arbeidslivet på Ørsta Camping. Og saman med faste stabile tilsette leverer dei smakfulle rettar av god kvalitet raskt og effektivt. Ørsta Camping har 14 fast tilsette gjennom året, og fleire i høgsesong jul og sommar.

Alle i Ørsta har eit forhold til Ørsta Camping og den gode maten dei serverer der, og det kjem folk frå heile regionen for å handle. Ørsta Camping er ein viktig bidragsyter til reiselivet, og til godt omdøme for Ørsta.

For Vivian  og hennar mange dyktige medhjelparar er alle gjestar like viktige!

Ørsta kommune sin næringspris for 2021 vert tildelt Ørsta Camping og dagleg leiar Vivian Ose Flø. Vi gratulerer!

Ørsta Camping får Ørsta kommune sin næringspris for 2021. Frå venstre ordførar Stein Aam, dagleg leiar i Ørsta Camping Vivian Ose Flø, Anne-Lise Ose, Julianne Flø og Sonja Takset. Ørsta kommune

Eiksenteret har lang tradisjon i Ørsta og var i fleire år lokalisert i Anders Hovdengate der dei var kjende for kvalitet, service og kompetanse. Haugen og Ulvestad vart eigarar i 2014, og selskapet hadde då ei omsetning på om lag 43 million.

Bedrifta vaks jamt og trutt, og lokala vart for små. Eiksenteret fekk nye merke innan landbruksmaskiner og andre nye produkt i sin portefølge. 

Dei to framoverlente leiarane har tort å satse, og kjøpte den gamle Grepafabrikken på Mosflata på tampen av 2017. Ein viktig hjelpar og medspelar i denne prosessen var Lars Oskar Fossen, i tillegg til Sparebank1 og Ørsta kommune. I lokala der Grepafabrikken var, har dei investert om lag 50 mill, og omsetninga i 2019 var på 107 mill kroner.

I dei flotte lokala har dei utvikla si eiga bedrift, og har samtidig lagt til rette for andre næringsaktørar. Det er i dag om lag 50 arbeidsplassar i den gamle Grepafabrikken, og det ryktast at lokala snart må utvidast!

Eiksenteret med Haugen og Ulvestad er eit lysande eksempel på etableringslyst, kreativitet og ein stor porsjon pågangsmot som vi verdset svært høgt.

Det er difor ei stor ære for meg som ordførar i dag å få dele ut næringsprisen for 2020 til Eik senteret Ørsta ved deira leiarar Knut Inge Haugen og Erling Ulvestad.

Takk for innsatsen og lykke til vidare!

Ordførar Stein Aam delte ut næringsprisen for 2020 til Eik senteret Ørsta ved deira leiarar Knut Inge Haugen og Erling Ulvestad. Maria Engeseth / Ørsta kommune

Staurset A.S. er 107 år. Ei tradisjonsrik konfeksjonsbedrift som i starten dreiv med skreddarverksemd.
Då Ørsta la grunnlaget for å satse på industri ved kraftutbygging i 1915, flytta Herlof Staurset Konfeksjon frå Vanylven til Ørsta. Dei bygde ny fabrikk i Vikegata, denne inneheldt kontor, fabrikk og fabrikkutsal over 3 etasjar, og på det meste var der 120 tilsette.

I 1970-åra var det store strukturendringar i konfeksjonsindustrien, og 1981 vart Staurset-fabrikken nedlagt, men fabrikkutsalet med herre- og ungdomskle som hadde vore knytt til fabrikkdrifta vart vidareførd, og vart det som skulle bringe denne bedrifta vidare.

Dagens drivarar Odd og Hallbjørn Staurset er tredje generasjon Staurset, som på 90-talet overtok og utvikla butikken til å verte ein komplett konfeksjonsbutikk for herre, dame, ungdom, samt sportskle og fjellutstyr.
Det er ein kjedeuavhengig og familieeigd butikk, som har utvikla eit tilbod som kundane set stor pris på, dei yter ein god service og er dyktige til å gi kvar enkelt kunde ei god oppleving.

Dei driv også eigen verkstad for at kundane skal få tilpassa sine klesplagg, det bidreg til eit høgare servicenivå i denne næringa. I dagens konfeksjonsbransje er dette unike kvalitetar som Staurset A.S. er åleine om å tilby kundane i distriktet.

Butikken i Vikegata er lett tilgjengeleg frå Vikegata, har også inngang frå eigen parkeringsplass, er lys og oversiktleg med ei god eksponering av varene, og kundane møter alltid ei hyggeleg betjening.

Takk for innsatsen og lykke til vidare!

Ørsta kommune

Bøstrand Transport AS har vore ei lokal verksemd  innan transportnæringa sidan 1985. Per Åge Bøstrand starta forsiktig med ein bil og sjåfør, og sidan har verksemda bygt seg opp gjennom hardt arbeid og god service til kundane. 
Eit nødvendig strategisk grep vart tatt i 2012, ved at transportverksemda flytta frå Hovden til Mosflata. Bøstrand Transport AS og 8 andre selskap ligg i dag under Bøstrandgruppen AS.  Det skjedde samtidig eit generasjonsskifte ved at brørne Yngve Ose og Andre Ose Bøstrand overtok drifta i Bøstrand Transport AS – med svært god hjelp av Halldis Ose Bøstrand.

Dei er i dag godt etablert på Mosflata i fine tilpassa lokale for dei tilsette. Dei har ein oppdatert vognpark på 45 bilar og 60 tilsette. Bedrifta er også ei lærebedrift og har i dag 6 lærlingar.

Lokalt samarbeid

Bøstrand Transport AS har vore, og vil fortsette å vere, ein svært viktig aktør for lokale firma i vår kommune. Dei har ytt rask service og leveranse av gods mellom Ørsta og andre destinasjonar nasjonalt og internasjonalt, noko som betrar konkurransekrafta for vårt lokale næringsliv. Det har vore særleg godt samarbeid inn mot store lokale firma som Grøvik, Vartdal Plast og Vik Ørsta AS. 

Bøstrand Transport AS er ein verdig vinnar av Næringsprisen 2018. Dei har gjort ein stor innsats i næringslivsamanheng for Ørsta. Yngve og Andre Bøstrand har sidan sommaren 2012 satsa strategisk og skapt mange nye arbeidsplassar, og vore eit godt førebilete for bransjen og næringslivet både lokalt og nasjonalt.

Takk for innsatsen og lykke til vidare!

Ørsta kommune

Sidan Fugl Føniks opna dørene på Lystadhjørnet for 13 år sidan,  har dei utvikla konseptet sitt gradvis og vorte ei solid og veldriven verksemd i ein tøff bransje.

I 2011 flytta dei kaffibaren frå det vesle huset i Anders Aarsæther gata til større og meir moderne lokale i Vikegata. Dette førte ikkje berre eit visuelt hamskifte, men gav også høve til å utvide konseptet med eit eige bakeri for glutenfrie varer. Eit etterlengta tilbod for mange. Verksemda og «familien» Føniks har heile vegen vore eit sterkt personleg prosjekt for Randi og Helge Blichfeldt. Dette viser seg kanskje først og fremst i kjensla av atmosfære, service og kvalitet, frå du kjem og til du går.

Fugl Føniks har utvikla seg til å verte eit fyrtårn innanfor sin bransje, med nedslagsfelt i heile regionen. Ein stilig og urban kaffibar, med eigen identitet og Barista i særklasse.

På mange måtar har Føniks også vore med på å utvikle Ørsta sentrum som handelsstad. Gode møteplassar med innhald har mykje å seie for korleis innbyggjarar og tilreisande opplever og brukar tettstaden. Med evna til å gjere seg til ei merkevare og som ein tydeleg trivselsfaktor i Ørsta, som att på alt har fått nynorskprisen, er det inga tvil om at Fugl Føniks har fortent næringsprisen for 2017! 

Ørsta kommune

Bjørdal Industrier har ei lang og god historie i Ørsta.  Frå 1907 då Petter E. Bjørdal starta sin smedverkstad med vognmakarkunsten som spesialområde,  via sønene si oppbygging  av mekanisk verkstad på vikeøyrane, til den moderne industribedrifta vi ser i dag.  Med ei omsetning på om lag 75 millionar kroner i år, og  med eit solid bein i fiskerinæringa,  er bedrifta ein god og viktig arbeidsplass for om lag 30 tilsette. 

Ein stabil arbeidsstokk med høg kompetanse har vore viktig for utviklinga av bedrifta.  Ei bedrift som er god på omstilling til nye produkt og nye marknader. Bedrifta har ein effektiv produksjon og utfører spesialoppdrag saman med eit nettverk av nasjonale og internasjonale underleverandørar.

Vi snakkar om ei bedrift som er skreddarar i stål, som utviklar nye produkt i samarbeid med kundane, og kan nemne dømer som:

Notvaskar og vassrensing, høgteknologisk vasskjæremaskin, balkongar med rekkverk av rustfritt stål, stålkomponentar til kraftverksbransjen og store bygg, komplette prosessliner til fiskefarty og landbaserte anlegg, for å nemne noko. 

Bjørdal Industrier tek hand om heile prosessen, frå prosjektering og utvikling til produksjon og montering. Dei leverer eit komplett produkt, og det set kundane pris på! Bjørdal Industrier er eit velkjent merkenamn med godt omdøme, og med kundar på alle kontinent.

Bjørdal Industrier sine kjerneområde er konstruksjon og montering av stålbygg og stålkonstruksjonar, i tillegg til prosjektering og levering av komplette fabrikkar til båtar. Dette er ei avansert og moderne bedrift som har utvikla jarnet sine eigenskapar frå smie til glatt rustfritt stål, tilpassa både matproduksjon og berande konstruksjonar. 

Fabrikken om bord på fiskebåten Ramoen er eit godt døme. Bjørdal Industrier har designa og utvikla, produsert og montert, alt med tanke på effektive produksjonsliner med gode og avanserte styringssystem. 

Neste år kan Bjørdal Industrier AS feire 110 år.  Ein sentral person i oppbygginga og utviklinga av selskapet har vore Elling Bjørdal. Sidan han vart tilsett i 1967 gjekk han gradene frå rekneskapsmedarbeidar til aksjonær og økonomisjef på 80-talet. Frå 2000 var han også dagleg leiar, og var med å etablere dagens Bjørdal Industrier i 2001. I dag takkar vi Elling for det han har betydd for bedrifta og for Ørsta.

I dag er Bjørn Meek eigar og drivar av Bjørdal Industrier AS. Ei bedrift som ser framover, og som byggjer vidare på industrihistoria til selskapet – og til Ørsta. Heile tida med fokus på neste prosjekt.

Det er ei stor glede å tildele Ørsta kommune sin næringspris for 2016 til Bjørdal Industrier AS ved dagleg leiar Bjørn Meek og Leif Petter Øyehaug (repr. frå dei tilsette i styret).

Gratulerer!

Ørsta kommune

Hotell Union Øye er eit av dei eldste og mest ærverdige hotella vi har i Noreg. Det er i dag eigd av 62°Nord, og har 27 unike rom. Dei siste åra har underetasjen vorte pussa opp og oppgradert til flotte lokalitetar for kurs og konferanse. Dette har vore ein strategi for å gi eit tilbod til bedriftsmarknaden, samstundes som ein sikrar berekraftig drift over ein lengre sesong.

Hotellet er bygd i sveitserstil og vart opna 5. juni 1891, og feirar neste år 125 års jubileum. Det har eit svært spesielt interiør der du blir sett over 100 år tilbake i tid, og du opplever ein god atmosfære og ro i dei ulike roma. Hotellet har frå starten av vore kjend for å vere vertskap for celebre gjestar frå både inn og utland. Eg kan nemne alt frå engelske lakselordar og tindebestigarar, til Edvard Grieg, Karen Blixten, Kong Wilhelm, Dronning Alexandra og Roald Amundsen. I 1906 var også Kong Håkon med Dronning Maude og tre år gamle Kronprins Olav på signingsferd.

I 1993, etter at hotellet vart nyopna etter ei omfattande restaurering, fekk det besøk av heile det europeiske kongehuset i forbindelse med Kong Harald og Dronning Sonja sitt sølvbryllaup, og dette sette igjen Hotell Union Øye på Europakartet. Ei oppfølging frå Toppen Becks tv-serie “Herskapelig” løfta igjen fram eksklusiviteten til dette hotellet. Det har alltid vore lagt vekt på at gjestane skal føle seg heime, og det handlar om å gi gjestane noko ekstra når dei kjem til dette hotellet. Det unike byggverket som er omkransa av ein fantastisk natur, har lokka både eksellenser og folk flest til Union Øye.

Mariann Øye Mork som vart tilsett som direktør ved hotellet som 22-åring i 2009, var då Noregs yngste hotelldirektør. Ho har teke ansvar for å vidareføre hotellet sin gode service og sitt gode rykte, ved å levere noko ekstra og uventa for sine gjestar. Mariann byr på seg sjølv med ein velkomst og eit handtrykk til gjestane som gjer at ein føler seg “heime” frå første stund, ikledd ei staseleg drakt frå Syd-Tirol. Ho syter også for å vidareføre hotellets lune atmosfære med gode historier og vakker song i hotellet si “Solstue”. Hotel Union Øye.

Det er heilt klart at dette hotellet framstår frå A-Å med eit unikt særpreg. All honnør til leiing, hotelldirektør og tilsette for at dei fører denne kulturskatten vidare i vår kommune, og samstundes har etablert trygge arbeidsplassar i grenda.

Gratulerer!

Ørsta kommune