I år går prisen til ein organisasjon som involverer mange frivillige, og som mange har fått hjelp av - eller besøk av. Prisvinnaren er kjent for stor frivillig innsats av mange over mange år, for stort sosialt engasjement, for redningsaksjonar og for ei særdeles aktiv omsorgsgruppe. I 2024 er Ørsta Røde Kors mottakar av årets eldsjel. Og då gjeld det både Hjelpekorpset og Ørsta Røde kors omsorg.

Først om Ørsta Røde kors omsorg, som gjer ein formidabel innsats for Ørsta sine innbyggarar, særleg for eldre og flyktningar! Dei driftar frisklivstilbodet Sterk og stødig for dei godt vaksne. Dei gjer ein formidabel innsats for flyktningane som bur her med flyktningtreff, juletreff 1. juledag og gratisbutikk. Dei organiserer tilbodet "Besøksvenner", og «Ferien for alle» for barn og unge.

Ørsta Røde Kors arrangerer turar for eldre og flyktningar og i samarbeid med fylkeslaget ferieturar for born. Dei sørger for blomar til jul og påske, stiller som vaksinevakt og bidreg på ulike arrangement. Dei frivillige i Røde kors omsorg er engasjerte, positive, samarbeidsvillige og elskar det dei gjer. Dei har gjort seg bemerka ikkje berre her i Ørsta, men også på landsbasis.

Innsatsen deira betyr svært mykje for den einskilde, og skaper livsglede, aktivitet og deltaking.

Hjelpekorpset er den andre hovudgruppa i Ørsta Røde Kors. Der mange frivillige er engasjerte knytt til arbeid rundt søk og redning. Vi ser dei i samband med store og små leiteaksjonar, som td. den svært omfattande leitinga etter Maya for nokre år sidan. Hjelpekorpset driv frivillig skipatrulje på Bondalseidet, og har saman med Volda felles skredgruppe med nasjonal spisskompetanse. Hjelpekorpset har også ei båtgruppe.

For å lukkast med dette trengst det mykje trening, kursing, godkjenning, men og utstyr. Dei har faste øvings- og samlingsdagar i lokala til Ørsta Røde Kors i Strandgata. Her er det også samla mykje utstyr. Ørsta Røde Kors har også eiga sambandsgruppe, og har eit VHF-nett som kan brukast over heile kommunen dersom Nødnettet dette ut.

Ørsta Røde Kors har rundt 500 medlemmar, med 55 aktive i Hjelpekorpset og 35 aktive i omsorgsgruppa.

Vi håper prisen kan vere ein inspirasjon for vidare engasjement og arbeid i lokalsamfunna. Prisen til Ørsta Røde Kors er derfor også ei takk og anerkjenning til dei som gjer ein frivillig innsats i lokalmiljøa rundt om i heile kommunen.

Gratulerer med pris som årets Eldsjel!

Ørsta Røde Kors vann eldsjelprisen for 2024. Ingvild Marie Taraldset / Ørsta kommune

Eli har lagt inn ein stor innstas som frivillig gjennom heile livet, og på mange ulike felt. I 2022 har ho vore leiar i Ørsta pensjonistlag i 10 år, engasjert seg stort i tusenårsstaden, Svendsengarden-styret der i mange år, i prosjektet «Leve heile livet».  Eli er heller ikkje redd for ny teknologi, og er kursleiar og arrangør i «trygg på nett» og datakurs for nybyrjarar. Ho er også aktiv og instruktør i trimtilbodet «Sterk og Stødig»,  i lokale på Røde-Korshuset, som har stor oppslutning. Eli starta spanskkurs for pensjonistar i 2019, dette går også i 2022. Ørsta pensjonistlag er det einaste laget i fylket med dette tilbodet. Eli Kjøde har også vore frivillig lenge, ho var mellom anna sentral i jonsokmila - eit sosialt trimopplegg som starta i 2007. 

Forslagsstillar avsluttar sånn i omtalen sin: «Eli Torbjørg Kjøde er raus på fritida si. Ho er ein berebjelke- eldsjel - i lokalt kulturarbeid.»

Vi håper prisen kan vere ein inspirasjon for alle i heile Ørsta til vidare engasjement og arbeid i lokalsamfunna. Prisen til Eli er derfor også ei takk og anerkjenning til personar og lag som gjer ein frivillig innsats i lokalmiljøa rundt om i heile kommunen.

Varaordførar Karen Høydal overrakk diplom, og ein gåvesjekk på kr 20.000 frå Sparebanken Møre – til eit allmennyttig formål Eli kan velje som kjem folk lokalt her i Ørsta kommune til gode.

Eli Kjøde er årets eldsjel 2022. Ørsta kommune

Johan Øye har gjort ein solid frivillig innsats for lokalsamfunnet over fleire år. Han er ei klassisk eldsjel som er kjend for sin store og mangeårige innsats med å skape trivsel og legge til rette for trimmarar/turgåarar.

«Johan Øye har over mange år i arbeidd med Skålavegen, lys og skilt, og gapahuken i Skåla. Han har lagt ned eit enormt arbeid for store og små i Ørsta.

Ikkje nok med at han har sett i gong alle desse flotte tiltaka, men han fyller opp med å halde gapahuken og området vedlike og utvikle det. Trur nesten han er ein tur i Skåla kvar dag for å sjå etter at alt er i orden.

Johan er ikkje ein som framhevar seg sjølv og derfor hadde det vore ekstra kjekt om han hadde fått denne prisen, det har han verkeleg fortent.» (Forslagsstillar).

I Skålavegen møter ein folk frå tidleg morgon til seine kvelden. Johan har brukt svært mykje fritid for å vedlikehalde Skålavegen dei siste tjue åra, han har sett opp benkar og bord, laga og sett ut trimapparat, vedomn og flaggstong. Flaggstonga er brukt til lys, og frå sentrum ser vi at gapahuken lyser opp no i den mørke desembertida.

Johan var ein pioner i å bygge gapahuk – det er verkeleg eit solid byggverk, og Johan har gjort mesteparten av arbeidet sjølv. Her er ly for ver og vind, og ein fin plass for born og vaksne å ete nista si. Han har skaffa sponsorar og organisert dugnadsarbeid for å sette opp 20 lysmaster, og dermed er Skålavegen ei triveleg plass å gå også i mørkna, og eit viktig turmål i Ørsta. Gapahuken og arbeidet til Johan har truleg bidrege til betre folkehelse i Ørsta.

Han har arrangert adventsfest med hornmusikk, nissar og korsong, nyttårssamlingar, og på 17.mai kan vi sjå flagget vaie i vinden, etter at Johan har vore opp om morgonen og heist det.

Vi håpar prisen kan vere ein inspirasjon for alle i heile Ørsta til vidare engasjement og arbeid i lokalsamfunna. Prisen til Johan er derfor også ei takk og anerkjenning til personar og lag som gjer ein frivilleg innsats i lokalmiljøa rundt om i heile kommunen. Stå på vidare!

Årets eldsjel får diplom og ein gåvesjekk på kr 20.000 frå Sparebanken Møre - til eit formål du kan velje som kjem folk lokalt til gode.

Johan Øye er Årets Eldsjel 2020. Maria Engeseth / Ørsta kommune

Synnøve Rekkedal Hill vert omtalt som ei klassisk eldsjel. Alltid full av energi. Alltid ei sak ho brenn for. Alltid ein søknad ho arbeider med, ein telefon for å skaffe bidrag, ein aksjon for å påverke, ein dugnad ho skal ha folk til, eller ei øving eller framsyning frå ballettskulen.

Synnøve har eit sterkt og breitt engasjement for heimbygda, for Hjørundfjorden og heile Ørsta og regionen. Ho organiserer og påverkar, får ting gjort - og gir andre lyst til å yte.

Du er høgt og lavt med eit utretteleg pågangsmot - eit ekte engasjement, for bygdene og for sentrum - og ikkje minst menneska, ungdomane og borna. Nokre av dei sakene du er engasjert i er trafikktrygging. Det er Hjørundfjord kulturvernlag - der du har vore leiar dei siste åra - med stadig nye prosjekt. Du skaffar pengar, skriv søknader og startar aksjonar – den siste i haust saman med andre for ny røntgenmaskin – og tidlegare aksjonar for å påverke og bevare tilbod ved vårt gode lokalsjukehus i Volda. Og ikkje minst har du vore avgjerande for ballettskulen i Ørsta og Volda – èin av landet sine største med 450 elevar i alderen 5-21 år. Synnøve har vore arbeidande styreleiar og rektor sidan 2001.

Synnøve har vore umåteleg viktig for alt dette. Men heller ikkje ho har gjort jobben åleine. Mange har bidratt både i kulturvernlaget, til restaurering, i aksjonane for sjukehuset og for ballettskulen. Èin av dine nære og viktige støttespelarar er Richard. Så litt av eldsjel-prisen er også din, Richard. For slik er det - også eldsjelene treng støtte og fellesskap!

Vi håper prisen kan vere ein inspirasjon for alle i heile Ørsta til vidare engasjement og arbeid i lokalsamfunna. Prisen til Synnøve er derfor også ei takk og anerkjenning til personar og lag som gjer ein frivilleg innsats i lokalmiljøa rundt om i heile kommunen. Stå på vidare!

Årets eldsjel får diplom og ein gåvesjekk på kr 20.000 frå Sparebanken Møre - til eit godt formål lokalt.

Synnøve Rekkedal Hill mottek diplom og sjekk. Ørsta kommune

Juryen framhevar engasjement, positivitet, inspirasjon, Fossen er seg sjølv, samlar støtte og har fått folk til å vere stolte av sentrum. Rett person til rett tid, gir folk trua og får folk med!

Fleire har meldt inn Fossen som kandidat til denne prisen. Dette er det dei har å seie om han: 

"Fossen har gjort ein fantastisk innsats for eit flottare Ørsta. Han er ei eldsjel av dei heilt store, smørblid, alltid positiv, sterkt engasjement for heimbygda si, flink til å få ting gjort, verkar positiv på omgjevnadene - andre får lyst til å yte også. Han framstår med ein positiv energi som verkar smittande.  Med denne energien klarte han å «vekke» Ørstingen til dugnad for Ørsta Sentrum. Han klarte med overbevising og truverd å få kommune, huseigarar og den jamne Ørsting til å tru på at dette kunne ein gjere noko med – i fellesskap.”

"Lars Oskar  er av den sjeldne typen som folk vert glade i.  Med sin veremåte skaper han brusande entusiasme som smittar over på alle."

Ørsta kommune og resten av juryen håper prisen kan vere ein inspirasjon for alle i heile Ørsta til vidare engasjement og arbeid i lokalsamfunna. Prisen til Fossen er difor også ei takk og anerkjenning til personar og lag som gjer ein frivilleg innsats i lokalmiljøa rundt om i heile kommunen. Stå på vidare!

Lars Oskar Fossen mottek diplom og sjekk. Ørsta kommune