Regjeringa har avgjort at Ørsta skal halde fram i den nye kontorstrukturen til Helfo, saman med Fredrikstad, Tønsberg, Sola og Mo i Rana. Kontoret i Kirkenes skal vidareførast.
"Dette er ei fantastisk gla-nyhende! Eg er imponert over utviklinga og ståpå-vilja til Helfo i Ørsta. Eg håper dei set seg i førarsetet når det gjeld vidare utvikling", seier ordførar Stein Aam.
I brevet frå Helfo står det: «Regjeringa har lagt vekt på dei same kriteria for vurdering av dei framtidige kontora som Helfo har nytta i si utredning:
-
Sikre rett kompetanse
-
Effektiv ressursutnytting
-
Sikre omstillings- og utviklingsdyktigheit
-
Halde fast ved formålet om regional fordeling av statlege arbeidsplassar».
Vidare står det at avgjersla vert grunngjeve med at innovasjon og digitalisering er essensielt for å oppnå ei brukarretta og effektiv offentleg forvaltning. Det vert skrive: «Auka bruk av sjølvbetening og automatisering vil få konsekvensar for arbeidsplassar og kompetansebehov. Færre enkle, manuelle prosessar reduserer behovet for tilsette. Samtidig vil dei komplekse oppgåvene som står att, krevje helsefagleg, juridisk og økonomisk kompetanse».
Kontora i Oslo, Bergen, Kristiansand, Voss, Eidsvoll, Kongsberg, Risør, Harstad, Gloppen, Vågå, Verdal, Nærøy, Lenvik, Beiarn, Orkdal og Brumunddal vert lagt ned.