Dette året er det seks helsefaglærlingar som har gjennomført fagprøven, og alle dei har fått resultatet ”Bestått meget godt”! I tillegg gjennomførte Malin, lærling i barne- og ungdomsarbeidarfaget fagprøven i mai, også ho med ”Bestått meget godt”!
Onsdag arrangerte kommunen ei samling for dei seks nyutdanna helsefagarbeidarane, for å gratulere dei med det flotte resultatet.
Statsministeren, ordføraren og andre gjester tok del på samlinga.
Lærlingansvarleg, Hilde Flotve Mo, orienterte om lærlingordninga og om utfordringar kring rekruttering i kommunen. Ørsta kommune er ikkje tilslutta eit opplæringskontor, me driv dette arbeidet sjølve. Me har utarbeidd nye opplæringsbøker, og bygt opp gode system rundt lærlingordninga. Me samarbeider med nabokommunane om fagdagar for lærlingane og opplæring for instruktørar. Me stiller krav, følgjer opp og gir tilbakemeldingar. Instruktørane våre gjer ein flott jobb. Me legg vekt på opplæring og oppfølging av instruktørane. Dei skal leggje til rette for at lærlingane får lære det faglege, samstundes som dei skal opparbeide yrkesidentitet og yrkesstoltheit. Fleire av lærlingane våre har andre morsmål enn norsk. Det er ikkje lett å tileigne seg det faglege, forstå dei språklege og kulturelle kodane og gjere seg forstått og skrive oppgåver på norsk, når den språklege og kulturelle bakgrunnen er ein heilt annan. Men på trass av språklege og kulturelle utfordringar har desse lærlingane likevel kome ut med eit særs godt resultat! Dei har lagt ned eit stort arbeid for å oppnå dette. Me må sikre oss at me har attraktive jobbar i helse og omsorg til dei nyutdanna fagarbeidarane. Då nyttar det ikkje med små deltidsstillingar og helgestillingar, det kan ikkje dei unge vaksne leve av.
Me har bygt ei god plattform for lærlingordninga i kommunen vår som gjer at me tek samfunnsansvaret vårt, samstundes som me sikrar oss kompetanse for framtida, avslutta lærlingansvarleg med.
Statsministeren delte ut fagbreva til dei nyutdanna helsefagarbeidarane, og understreka at Ørsta kommune gjer eit viktig og godt arbeid for å kvalifisere fagarbeidarar. Både dei nye fagarbeidarane og Ørsta kommune sette stor pris på statsministerbesøket!
.jpg)